काठमाडौं । फिफा विश्वकपको तयारी स्वरूप खेलिएको मैत्रीपूर्ण फुटबलमा स्पेन र इराकले बराबरी खेलेका छन् । गए राति स्पेनको म्युनिसिपल दे रियाजोर रङ्गशालामा सम्पन्न खेल १–१ गोलको बराबरीमा टुङ्गिएको हो ।
खेलको १६औँ मिनेटमा घरेलु टोली स्पेनले फरान टोरेसको गोलमार्फत अग्रता लिएको थियो । तर २७औँ मिनेटमा इराकले मर्चास डोस्कीको गोलबाट खेल बराबरीमा ल्यायो ।
युरो कप २०२४ को विजेता तथा विश्वकपको प्रमुख दाबेदार मानिएको स्पेनले खेलभर बल नियन्त्रणमा राखे पनि इराकको सुदृढ रक्षापङ्क्ति तोड्न सकेन । सन् १९८६ पछि पहिलो पटक विश्वकपमा फर्किन लागेको इराकले भने उत्कृष्ट प्रदर्शन गर्दै स्पेनलाई बराबरीमा रोक्न सफल भयो । अब स्पेनले अन्तिम तयारी खेल पेरुविरुद्ध खेल्नेछ ।
विश्वकपमा स्पेन समूह एचमा छ, जहाँ उसले केप भर्डे, साउदी अरेबिया र उरुग्वेसँग प्रतिस्पर्धा गर्नेछ . इराक भने समूह आईमा छ, जहाँ नर्वे, फ्रान्स र सेनेगलसँग समूह चरणमा खेल्नेछ । क्यानडा, मेक्सिको र अमेरिका संयुक्त आयोजनामा फिफा विश्वकप आउँदो जेठ २८ गतेदेखि हुँदैछ ।