काठमाडौं । अमेरिकासँगको दोस्रो टी–२० अन्तर्राष्ट्रिय क्रिकेटमा नेपालले अमेरिकालाई जितका लागि १७१ रनको लक्ष्य दिएको छ । टस जितेर पहिलो ब्याट्रिङ गरेको नेपालले निर्धारीत ओभरमा ६ विकेट गुमाएर १७० रन बनाएको हो ।
नेपालका लागि कुशल भुर्तेलले सर्वाधिक ९२ रनको अविजित पारी खेले । त्यस्तै अनिल साहले २५ रनको योगदान दिए । गुल्सन झाले १९ र कप्तान रोहित पौडेलले १८ रनको योगदान दिए ।
तीन खेलको टी–२० शृङ्खलामा नेपाल १–० ले अघि छ । अमेरिकासँगको पहिलो खेलमा नेपाल १७ रनले विजयी भएको थियो । आजको खेलमा जित निकाल्न सकेको खण्डमा नेपाल एक खेल अगावै सिरिज समेत जित्ने छ । नेपालले टी–२० शृङ्खलाको तेस्रो तथा अन्तिम खेल पर्सि सोमवार खेल्ने छ ।
यो टी–२० सिरिजपछि नेपालले अमेरिकामै आईसीसी विश्वकप क्रिकेट लिग–२ अन्तर्गत अमेरिका र स्कटल्यान्डसँग त्रिदेशीय एकदिवसीय सिरिज खेल्ने छ ।