काठमाडौं । राष्ट्रिय प्रजातन्त्र पार्टीले अर्थमन्त्री डा. स्वर्णिम वाग्लेलाई संसदीय छानबिनको आवश्यक रहेको ठहर गरेको छ। सोमबार संसद बैठकमा बोल्दै पार्टीका संसदीय दलका नेता ज्ञानेन्द्र शाहीले सो माग गर्न पुगे ।

यता, संसदमा प्रस्तुत गरेको बजेटमाथि छेडछाड गरेको र करका दर चुहावट गरेको आरोपमा अर्थमन्त्रीमाथि छानबिन हुनुपर्ने शाहीले सुनाए। करका दर चुहावट गर्नेलाई राजद्रोहको मुद्दा चल्नुपर्ने शाहीको भनाइ छ । उनले यसका विषयमा सरकारले नभई संसदले छानबिन समिति बनाउनुपर्ने बताए । सुशासनको माग गरेर आएको सरकारले कुशासनको बाटो नलिन उनले चेतावनी दिए ।

उनले दाबी गर्दै भने, ‘करका दर हेरफेरबारे कसलाई थाहा हुन्छ , सचिवलाई पनि थाहा हुँदैन । अर्थमन्त्री र अर्थमन्त्रीज्यूले तोकेका व्यक्तिहरुलाई मात्रै थाहा हुन्छ । सूचना लिक भएर ७५३ वटा बीवाइडी गाडी केरलाबाट १४ गते भन्सार पास हुन्छन्, २० गते गाडी आउँछ । अनि सरकारले छानविन समिति बनाउँछ । आफैं छानविन समिति बनाउने र कर्मचारीलाई डाम्न खोज्ने , अर्थमन्त्रीमाथि संसदीय छानविन हुनुपर्छ, यो राजद्रोह हो ।’