काठमाडौं । नेशनल लाइफ इन्स्योरेन्स कम्पनी लिमिटेडको जीवन बीमा कोषको आकार खर्ब माथि पुगेको छ । कम्पनीले सार्वजनिक गरेको गत आर्थिक वर्ष २०८२/८३ को चौथो त्रैमासिकसम्मको वित्तीय विवरण अनुसार जीवन बीमा कोषको आकार १ खर्ब ३ अर्ब ७१ करोड ४१ लाख पुगेको हो ।

कम्पनीको जीवन बीमा कोष अघिल्लो आर्थिक वर्षको भन्दा १०.३५ प्रतिशतले बढेको हो । अघिल्लो आर्थिक वर्षको असार मसान्तसम्म कम्पनीको जीवन बीमा कोष ९३ अर्ब ९८ करोड ७७ लाख रुपैयाँको रहेको थियो । जीवन बीमा कोषको आकार बढे पनि कम्पनीको नाफामा भने गिरावट देखिएको । समीक्षा अवधिमा कम्पनीले ३७ करोड ६ लाख रुपैयाँ खुद नाफा आर्जन गरेको छ । जुन अघिल्लो आर्थिक वर्षको वर्षको तुलनामा १०.२३ प्रतिशतले कम हो । कम्पनीले अघिल्लो आर्थिक बर्षमा ४१ करोड २८ लाख रुपैयाँ खुद नाफा कमाएको थियो । समीक्षा अवधिमा कम्पनीको नाफासँगै कम्पनीको प्रतिसेयर आम्दानी (ईपीएस) मा पनि गिरावट आएको छ । समीक्षा अवधिमा कम्पनीको इपीएस ६ रुपैयाँ ६४ पैसा पुगेको छ । अघिल्लो आवको अन्तिमसम्ममा कम्पनीको इपीएस ७ रुपैयाँ ९२ पैसा रहेको थियो ।

समीक्षा अवधिमा कम्पनी व्यापार विस्तारमा भने आक्रामक देखिएको छ । यो अवधिमा कम्पनीले २४ अर्ब १५ करोड ८७ लाख रुपैयाँ खुद बीमा शुल्क संकलन गरेको छ । जुन अघिल्लो वर्षको तुलनामा १२.५१ प्रतिशतले बढी हो । अघिल्लो वर्ष कम्पनीले २१ अर्ब ४७ करोड २७ लाख रुपैयाँ खुद बीमा शुल्क आर्जन गरेको थियो ।

कम्पनीको कुल आम्दानी १०.४३ प्रतिशतले बढेर ३१ अर्ब ६१ करोड रुपैयाँ पुग्दा कुल खर्च पनि ११.०४ प्रतिशतले बढेर ३० अर्ब ४५ करोड ९२ लाख रुपैयाँ नाघेको छ । ५ अर्ब ६९ करोड १६ लाख रुपैयाँ चुक्ता पूँजी रहेको कम्पनीको महाविपत्ति कोष ५.४२ प्रतिशतले बढेर ७४ करोड ५९ लाख रुपैयाँ कायम भएको छ ।

समीक्षा अवधिमा कम्पनीको रिटेन्ड अर्निङमा भने ४३.७६ प्रतिशतले घटेको छ । अघिल्लो वर्ष ८७ करोड १० लाख रुपैयाँ रहेको जगेडा कोष ४८ करोड ९८ लाखमा झरेको छ । कम्पनीको प्रतिसेयर नेटवर्थ १२७ रुपैयाँ ७५ पैसा रहेको छ ।