काठमाडौं । नेपाल भ्रमणमा आएको भुटानको राष्ट्रिय टिमविरुद्धको पहिलो म्याचमा गण्डकी ११ ले सहज जित हात पारेको छ । भुटानले दिएको ९६ रनको सहज लक्ष्य गण्डकीले २ विकेट क्षतिमा भेट्टायो ।

पहिलो ब्याटिङ गरेको भुटानले १९.३ ओभरमा ९६ रन बनाएर अलआउट भएको थियो । भुटानका लागि ओपनर सोनाम छोपेल र नरजंग मिक्यो दोर्जीले समान २७-२७ रन बनाए । नाम्गे थिन्लेले १८ बलमा १६ रनको योगदान दिए ।

गण्डकीका स्पिनरहरुले भुटानको ब्याटिङ क्रम ध्वस्त बनाएका थिए । सुवास भण्डारीले ४ ओभरमा १५ रन खर्चेर ४ विकेट लिए । अप्राजित पौडैलले ४ ओभरमा १० रन दिएर ३ विकेट हात पारे ।

भुटानले दिएको झिनो लक्ष्य नेपालले ११ ओभरमै भेटेको थियो । नेपालका ओपनर ईश्वर क्षेत्रीले २२ बलमा अविजित ३४ रन जोडे । दीपक डुम्रे १९ बलमा २६ रन बनाएर अविजित रहे ।

ओपनर अर्जुन कुमालले १८ बलमा २२ रन बनाएर आउट भएका थिए । भुटानका बलर सोनाम यसे र नामगे थिनले ले १-१ विकेट हात पारे ।