काठमाडौं । मंगलबार पनि सेयर बजार दोहोरो अंकले घटेर बन्द भएको छ । अघिल्लो दिन पनि दोहोरो अंकले घटेको सेयर बजार आज पनि दोहोरो अंकले घटेर बन्द भएको हो ।

मंगलबारको कारोबार बन्द हुँदा सेयर बजार परिसूचक १३ दशमलव ०९ अंकले घटेर २६३२ दशमलव ९४ विन्दुमा पुगेको छ । पछिल्लो सयम लगातार रुपमा सेयर बजार घटिरहेको छ । कारोबार रकममा पनि दिन प्रतिदिन गिरावट आइरहेको छ । मंगलबारको सेयर बजार बन्द हुँदा १७० कम्पनीको सेयर मूल्य घटेको छ भने ६७ कम्पनीको सेयर मूल्य बढेको छ। त्यस्तै ८ कम्पनीको सेयर मूल्य भने स्थिर रहेको छ ।

मंगलबार परिसूचकसँगै कारोबार रकममा पनि गिरावट आएको छ । अघिल्लो दिन ९ अर्बभन्दा बढीको कारोबार भएको बजारमा आज ७ अर्बभन्दा बढीको कारोबार मात्रै भएको छ । आजको सेयर बजार कारोबार बन्द हुँदा ३२८ कम्पनीको १ करोड ९० लाख ७७ हजार ५८३ कित्ता सेयर ९३ हजार ४५९ पटक खरिद बिक्री हुँदा ७ अर्ब २४ करोड ५५ लाख ६८ हजार ४२१ रुपैयाँको मात्रै कारोबार भएको छ ।

त्यस्तै ‘क’ वर्गका कम्पनीको मापक सेन्सेटिभ इन्डेक्स पनि १ दशमलव ८० घटेर ४६७ दशमलव ३८ अंकमा पुगेको छ । आज १३ उपसूचकमध्ये १ उपसूचकको मूल्य बढेको छ भने एउटा उपसूचकको सेयर मूल्य स्थिर रहेको छ । ११ उपसूचकको सेयर मूल्यमा भने गिरावट आएको छ । आज सेयर बजारमा १ कम्पनीको सेयर मूल्यमा सकारात्मक सर्किट लागेको छ ।