काठमाडौं । घरेलु टोली भारतले न्युजिल्याण्ड विरुद्धको पहिलो टेष्टमा सामान्य लक्ष्य दिएको छ । दोस्रो पारीमा समालिएको प्रदर्शन गरेको भारतले न्युजिल्याण्डलाई जितका लागि १०७ रनको सामान्य लक्ष्य दिएको हो ।

पहिलो पारीमा विर्सन लायक प्रदर्शन गरेको भारतले दोस्रो पारीमा भने ४६२ रनको योगफल बनाए पछि न्युजिल्याण्डले उक्त लक्ष्य पाएको हो । घरेलु टोलीका लागि सरफराज खानको शतक प्रहार गरे । उनको सतकका बाबजुत पनि भारतले ठूलो लक्ष्य प्रस्तुत गर्न सकेनन् । घरेलु टोली पहिलो पारीमा ३ सय ५६ रनले पछि परेको थियो ।

दोस्रो पारीमा राम्रो सुरुवात गरेको भारतका लागि मध्यक्रमका खेलाडी चल्न सकेनन् । घरेलु टोलीले ४०८ रनमा ३ विकेट गुमाएको अवस्थामा थियो । त्यस पछि बाँकी ७ विकेट मात्र ५४ रनमा गुमायो । घरेलु टोलीका लागि सरफराजले १ सय ५०, ऋषभ पन्तले ९९, विराट कोहलीले ७० तथा कप्तान रोहित शर्माले ५२ रनको योगदान दिए । पाहुना टोलीका लागि रचिन रविन्द्रको शतक सहयोगमा पाहुना टोलीले पहिलो पारीमा फराकिलो अग्रता कायम गरेको थियो ।

दोस्रो पारीमा पाहुना टोलिका लागि म्याट हेनरी र विलियम ओरोर्कले समान ३, अजाज पटेलले २ तथा टिम साउथी र ग्लेन फिलिप्सले समान १ विकेट लिए । त्यसअघि वर्षाका कारण पहिलो दिनको खेल पूर्ण रुपले प्रभावित भएकोले दोस्रो दिन मात्र टस सम्भव भएको थियो । भारतको बेंगलुरुमा टस जितेर ब्याटिङ सुरुवात गरेको घरेलु टोली पहिलो पारी ४६ रनमा समेटियो । घरेलु टोलीका लागि विकेट किपर ब्याटर ऋषभ पन्तले सर्वाधिक २० तथा ओपनर यशस्वी जैसवालले १३ रन जोडे ।

भारतको टेस्ट इतिहासमा कुनै पनि पारीमा बनेको यो तेस्रो कम योगफल हो । पहिलो पारीमा भारतले बनाएको यो सबैभन्दा कमको योगफल हो । भ्रमणकारी टोलीका लागि म्याट हेनरी एक्लैले ५ विकेट लिए । विलियम ओरोर्कले ४ तथा टिम साउथीले १ विकेट लिए । पहिलो पारीमा पाहुना टोलीले ४०२ रन बनाउँदै ३ सय ५६ रनको अग्रता लिएको थियो । टोलीका लागि रचिन रविन्द्रले १ सय ३४ रनको शतकीय इनिङ खेल्दा ओपनर डेभन कन्वेले ९१, टिम साउथीले ६५ रनको योगदान दिए ।

घरेलु टोलीका लागि रविन्द्र जडेजा र कुलदिप यादवले समान ३, मोहम्मद सिराजले २ तथा जसप्रित बुमराह र रविचन्द्रन आश्विनले समान १ विकेट लिए ।