काठमाडौं । साताको पहिलो कारोबार दिन आइतबार सेयर बजारमा उच्च अंकको गिरावट आएको छ । गत हप्ताको बिहीबार सामान्य बढेको सेयर बजार आज ४७ दशमलव ४४ अंकले घटेको हो ।

आजको कारोबार बन्द हुँदा परिसूचक २७०० विन्दुभन्दा तल झरेको छ । आजको कारोबार बन्द हुँदा नेप्से परिसूचक २६९७ दशमलव ९१ विन्दुमा पुगेको छ । यो अघिल्लो कारोबारभन्दा १.७२ प्रतिशतको गिरावट हो। आज सेयर बजारमा कारोबार भएका कम्पनीमध्ये २२६ कम्पनीको सेयर मूल्य घटेको छ भने १८ वटाको मात्रै मूल्य बढेको छ ।

त्यस्तै आज ‘क’ वर्गका कम्पनीको मापक सन्सेटिभ इन्डेक्स पनि ७ दशमलव ९१ अंकले घटेर ४८७ दशमलव ३९ विन्दुमा पुगेको छ । आजको कारोबार बन्द हुँदा १३ वटा उपसूचकको परिसूचकमध्ये १२ वटाको सेयर मूल्य घटेको छ भने एउटाको स्थिर रहेको छ ।

परिसूचक घटेको दिन कारोबार रकममा भने सुधार देखिएको छ । गत साताको बिहीबार ६ अर्बभन्दा बढीको कारोबार भएको बजारमा आज ८ अर्बभन्दा माथिको कारोबार भएको छ । आज ३१५ कम्पनीका २ करोड ८ लाख ६८ हजार ९१९ कित्ता सेयर ८८ हजार ७१४ पटक खरिद बिक्री हुँदा ८ अर्ब १८ करोड २ लाख ६२ हजार ५७२ रुपैयाँ बराबरको कारोबार भएको छ ।

आज सेयर बजारमा एउटा कम्पनीको सेयर मूल्यमा सकारात्मक सर्किट लागेको छ भने एउटा कम्पनीको सेयर मूल्यमा नकारात्मक सर्किट लागेको छ ।