काठमाडौं । भौतिक पूर्वाधार तथा यातायात मन्त्रालयले निर्माण व्यवसायीको बाँकी रहेको ५ अर्ब बक्यौता भुक्तानी गरेको छ । मन्त्रालयले निर्माण व्यवसायीहरुको ५ अर्ब ५ करोड रुपैयाँ भुक्तानी गरेको हो ।

भौतिक मन्त्रालय सचिव केशवकुमार शर्माले सो रकम भुक्तानी गरेको जनाएका हुन् । उनका अनुसार व्यवसायीहरुको ६० प्रतिशत रकम भुक्तानी गरेको हो । अर्थ मन्त्रालयले साउन १ गते मन्त्रालयको बजेटबाट रकम रकमान्तर गर्ने वा अघिल्लो त्रैमासिकको पनि अगाडि तानेर भुक्तानी गर्न सहमति दिएबमोजिम ६० प्रतिशत रकम भुक्तानी गरिएको सचिव शर्माले बताए ।

निर्माण व्यवसायीको अझै ८ अर्ब ७१ करोड रुपैयाँ भुक्तानी गर्नुपर्नेमा अझै ३ अर्ब ६६ करोड रुपैयाँ निर्माण व्यवसायीलाई दिन बाँकी रहेको छ । अर्थ मन्त्रालयमा निर्माण व्यवसायीको भुक्तानीका निम्ति रकम निकासा माग गरिए पनि विनियोजन विधेयकले गर्दा पहिलो तीन महिना भुक्तानी गर्न नसकिएको उनले उल्लेख गरे ।

‘भौतिक पूर्वाधार तथा यातायात मन्त्रालयले गत वर्ष निर्माण व्यवसायीहरुलाई भुक्तानी गर्ने योग्य भइसकेको तर भुक्तानी गर्न नसकेको यो मन्त्रालय अन्तर्गत ८ अर्ब ७१ करोड थियो । त्यो मध्ये अर्थ मन्त्रालयले साउन १ गते मन्त्रालयको बजेटबाट रकम रकामान्तर गर्ने वा अघिल्लो त्रैमासिकको पनि अगाडि तानेर भुक्तानी गर्न सहमति दिए बमोजिम ५ अर्ब ५ करोड भुक्तानी गरेका छौं । ६० प्रतिशत रकम भुक्तानी गर्नसक्यौं । त्यसपछि बाँकी रकम अपुग हुँदा ३ अर्ब ६६ करोड रकम निर्माण व्यवसायीहरुलाई भुक्तानी गर्न बाँकी छ,’ उनले भने ।