मोरङ । पूर्वराष्ट्रपति विद्यादेवी भण्डारीले आफू अहिले दलीय जिम्मेवारी लिने चरणमा पुगी नसकेको बताएकी छिन् । आज विराटनगरमा सञ्चारकर्मीसँग कुरा गर्दै उनले यस्तो बताएकी हुन् ।

राजनीतिमा चासो राख्नेले छलफलको विषय बनाएपनि दलीय जिम्मेवारी लिने चरणमा आफू पुगी नसकेको उनले भनाइ थियो । उनले राष्ट्रपति प्रणाली र राष्ट्रपति पद गैरराजनीतिक जिम्मेवारी नभएको उल्लेख पनि उल्लेख गरिन् । ‘अहिले मिडियामा मेरो बारेमा आएका कुरा गलत छन्,’ उनले भनिन् । पूर्वराष्ट्रपति भण्डारीले आफू सचेत, सङ्गठित भएर हिँडेदेखि राष्ट्रिय राजनीतिमा चासो राखेको बताइन् । ‘हरेकले राष्ट्रिय राजनीति बुझ्न आवश्यक छ, राजनीतिबाट कोही अछूत छैन र राजनीतिमा गहिरो चासो छ,’ उनले भनिन् ।

राष्ट्रको समग्र विकासमा सबैको भूमिका महत्वपूर्ण हुने भएकाले आफ्नो स्थानबाट योगदान गर्नु पर्ने आवश्यक रहेको उनको भनाइ थियो । विज्ञान प्रविधिको विकास, महिला, बालबालिकाक्षेत्रको पछौटेपन हटाउन एवं खानेपानी समस्या समाधानमा सबैले आफ्नो क्षेत्रबाट काम गर्न सकेमा मुलुकले समृद्धि हासिल गर्ने उनले बताइन् ।