काठमाडौं । यही आउँदो भदौ २१, २२ र २३ गते याङ्शेर गुम्बा, डोल्पोका प्रमुख लामा, परमश्रद्धेय रानाग छोक्तुल रिनपोछे (डोल्पो बुद्ध)को अगुवाइमा शेर्पा गुम्बा बौद्धमा तीन दिने महत्त्वपूर्ण पूजा आयोजना हुँदैछ । भदौ २१ र २२ गते विशेष शिन्पोइ नेद्रेन पूजा सम्पन्न हुने भएको हो ।

उक्त विशेष दिनको पुजामा दिवङ्गत आत्माहरुले चीर शान्ति पाओस र परम आनन्दको भूमि सुखावतीमा पुनर्जन्म होस भन्ने शुद्ध भावका साथ अमिताभ बुद्धको मन्त्रोच्चारणसहितको साधना गरिनेछ । कार्यक्रमको आरम्भ अमिताभ बुद्धको अनन्त प्रकाशको मण्डल खोल्ने पूजाबाट हुनेछ । जसले संसारका सम्पूर्ण प्राणीहरूमा बुद्धको आशीर्वाद प्रवाह गर्दछ । भक्तजनहरूले आफ्ना दिवङ्गत परिवारका सदस्य, आफन्त, मित्रजनहरुको आत्महरुको भक्तिभावका साथ श्रद्दा अर्पण गर्नका लागि उक्त पूजा अगावै नाम अर्पण गर्न सक्नु हुनेछ ।

पुजाको सोही दिन पनि उपस्थित भै दिवङ्गतहरुको नाम टिपाउन सक्न हुनेछ । यसै गरि भदौ २३ गते अर्थात् पुजाको अन्तिम दिन भगवान बज्रकिलायको मन्त्रपाठसहित भव्य पूजाको आयोजना हुनेछ । यस पूजाले यस पृथ्वीका सम्पूर्ण प्राणीको आन्तरिक र बाह्य विघ्न –बाधा तथा नकारात्मक शक्तिहरू नष्ट गर्दै दशा–ग्रह शान्ति, सुख–शान्ति र समृद्धि प्राप्तिका लागि कामना गरिन्छ ।