काठमाडौं । समता घरेलु लघुवित्त वित्तीय संस्था लिमिटेडले आफ्ना शेयरधनीको हितग्राही खातामा ५ प्रतिशत बोनस शेयर जम्मा गरिएको जनाएको छ।

कम्पनीको गत पुस ३० गते सम्पन्न १२औं वार्षिक साधारण सभाबाट पारित ५ प्रतिशत बोनस शेयर नेपाल स्टक एक्सचेन्ज लिमिटेड र सिडिएस एण्ड क्लियरिङ लिमिटेड मा सूचीकृत तथा दर्ता भई अभौतिक रूपमा कारोबार गर्न मिल्ने भइसकेको छ।

कम्पनीले पुस १७ गतेसम्म शेयर अभौतिकीकरण गराइसकेका शेयरधनीहरूको बोनस शेयर सम्बन्धित हितग्राही खातामा जम्मा गरिएको छ भने सो मितिपछि शेयर अभौतिकीकरण गराएका शेयरधनीहरूको हकमा भने क्रमशः बोनस शेयर खातामा जम्मा हुने व्यवस्था मिलाइएको कम्पनीले जनाएको छ।

हालसम्म पनि शेयर अभौतिकीकरण नगरेका शेयरधनीले आफ्नो शेयर अभौतिकीकरण गराएपछि बोनस शेयरसमेत हितग्राही खातामै प्राप्त गर्न सक्ने कम्पनीले उल्लेख गरेको छ। त्यस्तै पुस १७ गतेसम्म शेयर धितो बन्धक राखी कर्जा लिएका शेयरधनीहरूको हकमा बोनस शेयर पनि सम्बन्धित बैंक तथा वित्तीय संस्थाको नाममा रोक्का जनाई हितग्राही खातामा जम्मा गरिएको कम्पनीले जनाएको छ।

सम्बन्धित शेयरधनीले कर्जा राफसाफ गरिसकेपछि सम्बन्धित बैंक वा वित्तीय संस्थामा सम्पर्क गरी उक्त शेयर फुकुवा गराउनुपर्ने कम्पनीले जानकारी दिएको छ। उक्त मितिपछि रोक्का राखिएका शेयरधनीहरूको बोनस शेयर भने हितग्राही खातामा रोक्का नजनाई जम्मा हुने कम्पनीले स्पष्ट पारेको छ।