काठमाडौं । रिलायबल नेपाल लाइफ इन्स्योरेन्स लिमिटेडको नाफामा सामान्य वृद्धि देखिएको छ । कम्पनीले सार्वजनिक गरेका चालु आर्थिक वर्ष २०८२/०८३ को तेस्रो त्रैमासिकसम्मको अपरिष्कृत वित्तीय विवरण अनुसार नाफामा सामान्य सुधार देखिएको हो ।

चालु आर्थिक वर्षको ९ महिनासम्मको अवधिमा कम्पनीले कुल ४७ करोड ४ लाख रुपैयाँ खुद नाफा आर्जन गरेको छ । गत आर्थिक वर्षको सोही अवधिमा कम्पनीको नाफा ४६ करोड ५७ लाख रुपैयाँ रहेको थियो । समीक्षा अवधिमा कम्पनीले ४ अर्ब ३५ करोड ४३ लाख रुपैयाँ खुद बीमा शुल्क संकलन गरेको छ । गत आर्थिक वर्षको सोही अवधिमा यस्तो रकम ३ अर्ब ४७ करोड ९४ लाख रुपैयाँ रहेको थियो ।

कम्पनीको कुल आम्दानी ५ अर्ब ५० करोड ६७ लाख रुपैयाँ पुगेको छ जुन गत आर्थिक वर्षको सोही अवधिमा ४ अर्ब ७६ करोड ३७ लाख रुपैयाँ थियो। कुल खर्च पनि बढेर ५ अर्ब २ करोड ७५ लाख रुपैयाँ पुगेको छ। अघिल्लो वर्ष यस्तो खर्च ३ अर्ब ३१ करोड ८ लाख रुपैयाँ रहेको थियो । कम्पनीको प्रति सेयर आम्दानी (ईपीएस) घटेको छ । गत आर्थिक वर्षको तेस्रो त्रैमाससम्म १३.३८ रुपैयाँ रहेको ईपीएस चालु आर्थिक वर्षमा घटेर १२.०७ रुपैयाँमा सीमित भएको छ। प्रति सेयर नेटवर्थ १४६.१७ रुपैयाँ रहेको छ भने मूल्य आम्दानी अनुपात ३८.६१ गुणा कायम भएको छ ।

वित्तीय अवस्थातर्फ कम्पनीको कुल सम्पत्ति बढेर २४ अर्ब ३९ करोड ९८ लाख रुपैयाँ पुगेको छ। गत आर्थिक वर्षको अन्त्यसम्म यस्तो सम्पत्ति २२ अर्ब ४ करोड ३१ लाख रुपैयाँ रहेको थियो। कम्पनीको जगेडा कोष पनि बढेर ६८ करोड ३० लाख रुपैयाँ पुगेको छ। चुक्ता पूँजी ५ अर्ब १९ करोड रुपैयाँ रहेको कम्पनीको महाविपत्ति कोषमा २७ करोड ६८ लाख रुपैयाँ रहेको छ । यता कम्पनीको जीवन बीमा कोष १६ अर्ब ३४ करोड ९७ लाख रुपैयाँ पुगेको छ। यस्तै कम्पनीको सोल्भेन्सी अनुपात २.५४ गुणा कायम रहेको छ।