काठमाडौं । ४७ औँ विश्व पर्यटन दिवसको अवसरमा नेपाल एशोसिएशन अफ टुर एण्ड ट्राभल एजेन्ट्स (नाट्टा)ले आइतबार ‘नेपाल कलिङ–नाट्टा हेरिटेज रन २०२६’ मा पुरुषतर्फ रविन्द्र रावत र महिलातर्फ सुजिना रामदाम प्रथम भएका छन् । वसन्तपुरदेखि पाटनसम्म भएको हेरिटेज रनमा पुरुषतर्फ सलमान शेख द्वित्तीय र शेरबहादुर शाही तृत्तीय भए भने महिलातर्फ सुमित्रा तामाङ द्वितीय र संग्रिला श्रेष्ठ तृत्तीय भए ।

कार्यक्रममा वरिष्ठ धावक बैकुण्ठ मानन्धर प्रमुख अतिथिका रूपमा सहभागी थिए । काठमाडौं उपत्यकाका ऐतिहासिक तथा सांस्कृतिक सम्पदालाई पर्यटनसँग जोड्दै नेपाललाई जीवन्त, सुरक्षित र आकर्षक गन्तव्यका रूपमा प्रवद्र्धन गर्ने उद्देश्य हेरिटेज रन आयोजना गरिएको नाट्टाले जनाएको छ ।

काठमाडौं वसन्तपुरबाट सुरु भएको हेरिटेज रन काठमाडौं र ललितपुरका विभिन्न ऐतिहासिक, सांस्कृतिक तथा सम्पदा क्षेत्र हुँदै पाटन दरबार क्षेत्रमा पुगेर सम्पन्न भएको छ । वसन्तपुरबाट विशाल बजार, न्युरोड गेट, रत्नपार्क, शहीद गेट, दशरथ रंगशाला, थापाथली, साझा पेट्रोल पम्प हुँदै ललितपुरको लविम मलबाट पाटन दरबार क्षेत्रमा पुगेर समापन गरिएको छ ।

दौडमा पर्यटन व्यवसायी, पर्यटनसम्बद्ध विभिन्न संघ–संस्था, युवा तथा सर्वसाधारणको सहभागिता रहेको नाट्टाले जनाएको छ । ऐतिहासिक सम्पदा, संस्कृति, वातावरण र पर्यटन व्यवसायबीचको सम्बन्धलाई सुमधुर बनाउन कार्यक्रमले सहयोग पुग्ने विश्वास नाट्टाका सचिव केदार घिमिरेले बताए । नेपालको पर्यटन क्षेत्र पूर्ण रूपमा सुरक्षित रहेको, यथावत रुपमा सञ्चालन भइरहेको र नेपाल खुला छ भन्ने सन्देश दिनुका साथै सांस्कृतिक सम्पदाको प्रवद्र्धनमा कार्यक्रम आयोजना गरिएको उनले बताए ।

यसअघि नाट्टाले ‘नेपाल कलिङ’ र ‘नेपाल ओपन’ अभियानलाई प्रवद्र्धन गर्दै दुईदिने विशेष कार्यक्रमसमेत आयोजना गरेको उनले बताए । ‘पर्यटनलाई पुनर्संरचना गर्न डिजिटल एजेन्डा र कृत्रिम बौद्धिकता’ भन्ने नाराका साथ विश्व पर्यटन दिवस विभिन्न कार्यव्रmम गरी मनाइँदै छ । संस्कृति, पर्यटन तथा नागरिक उड्डयन मन्त्रालय, नेपाल पर्यटन बोर्ड, पर्यटन विभाग तथा पर्यटन क्षेत्रका संघसंस्थाको अगुवाईमा विभिन्न कार्यक्रम आयोजना गरिएका छन् । हरेक वर्ष सेप्टेम्बर २७ मा विश्व पर्यटन दिवस मनाइन्छ ।

विश्व अर्थतन्त्रमा पर्यटनको ठुलो योगदान रहेको छ । आय र रोजगारी वृद्धि गर्न पर्यटन क्षेत्रले महत्वपूर्ण भूमिका खेल्दै आएको छ । नेपाल प्राकृतिक, धार्मिक र सांस्कृतिक सम्पदाले धनी मुलुक भएकाले विश्वका पर्यटक तान्न सकिने प्रवल सम्भावना रहेको छ ।