दार्जिलिङमा आयोजित ग्लोबल शेर्पा मिट–२०२६ मा इतिहास, संस्कृति र समसामयिक चुनौतीबारे छलफल |

सोनादा, दार्जिलिङ । भारतको पश्चिम बंगालस्थित दार्जिलिङको सोनादामा पूर्वी हिमालयका शेर्पा समुदायबारे पहिलो अन्तर्राष्ट्रिय सम्मेलन सम्पन्न भएको छ । ग्लोबल शेर्पा मिट–२०२६ अन्तर्गत दोस्रो दिन शुक्रबार आयोजित सम्मेलनमा दार्जिलिङ, सिक्किमलगायत विभिन्न क्षेत्रका शेर्पा समुदायका प्रतिनिधि, अगुवा, विद्वान् तथा विद्यार्थी सहभागी भएका थिए ।

अल इन्डिया शेर्पा बुद्धिस्ट एसोसिएसनले ग्लोबल शेर्पा एसोसिएसनसँगको सहकार्यमा सम्मेलन आयोजना गरेको हो ।

सम्मेलनमा सिक्किम विधानसभाका सभामुख एम. एन. शेर्पा प्रमुख अतिथिका रूपमा सहभागी भएका थिए । त्यस्तै, विद्यार्थी कल्याण बोर्डका अध्यक्ष सोनाम छोपेल शेर्पा विशिष्ट अतिथिका रूपमा उपस्थित थिए ।

सम्मेलनमा विभिन्न देशमा रहेका शेर्पा संघसंस्थाका अध्यक्ष तथा प्रतिनिधिहरूको समेत सहभागिता थियो । कार्यक्रममा विद्वान् तथा अनुसन्धानकर्ताहरूले शेर्पा समुदायको इतिहास, संस्कृति, परम्परा र वर्तमान अवस्थासँग सम्बन्धित विभिन्न विषयमा अनुसन्धानपत्र प्रस्तुत गरेका थिए ।

सम्मेलनले पूर्वी हिमालयसहित विश्वभर छरिएर रहेका शेर्पा समुदायबीच ज्ञान, अनुभव र विचार आदानप्रदान गर्ने अन्तर्राष्ट्रिय मञ्च प्रदान गरेको आयोजकले जनाएको छ ।

शेर्पा समुदायको समृद्ध सांस्कृतिक सम्पदाको संरक्षण, समुदायले सामना गरिरहेका समसामयिक चुनौतीमाथि छलफल तथा विभिन्न देशमा रहेका शेर्पाबीच एकता, सहकार्य र आपसी सम्बन्ध सुदृढ बनाउने विषय सम्मेलनका प्रमुख उद्देश्य रहेको छ ।

सम्मेलनले शेर्पा समुदायको ऐतिहासिक पहिचान, मौलिक संस्कृति र परम्पराको संरक्षण गर्दै आगामी पुस्तामा त्यसको हस्तान्तरण गर्ने विषयलाई समेत महत्त्व दिएको छ ।