नेपाल उसु महासंघका महासचिव तथा दक्षिण एसियाली उसु महासंघका सचिव ल्हाक्पा छिरिङ लामा एसियाली उसु महासंघको प्रचारप्रसार तथा प्रवद्र्धन समितिको कार्यकारी सदस्यमा नियुक्त भएका छन् ।

जापानको आइची प्रान्तस्थित नागोया सहरमा सेप्टेम्बर १९ मा सम्पन्न एसियाली उसु महासंघको २०औँ महासभाले लामालाई सन् २०२६ देखि २०३० सम्मको चारवर्षे कार्यकालका लागि उक्त जिम्मेवारी दिएको हो ।

नियुक्तिपछि लामाले एसियाली उसु महासंघका अध्यक्ष, महासचिव, पदाधिकारी तथा सम्बन्धित सबैप्रति आभार व्यक्त गरेका छन् । उनले आफ्नो अनुभव र क्षमतालाई उपयोग गर्दै एसियाली क्षेत्रमा उसु खेलको विकास, विस्तार र प्रवद्र्धनमा सक्रिय भूमिका निर्वाह गर्ने प्रतिबद्धता जनाएका छन् ।

लामाले सदस्य राष्ट्रहरूबीच सहकार्य र एकता सुदृढ गर्ने, युवापुस्तालाई उसु खेलप्रति आकर्षित गर्ने तथा अन्तर्राष्ट्रियस्तरमा यस खेलको पहिचान र लोकप्रियता बढाउन पहल गर्ने बताएका छन् ।

उनले आफ्नो नियुक्तिलाई व्यक्तिगत उपलब्धिमा मात्र सीमित नभई नेपाली उसु खेल क्षेत्रकै गौरवका रूपमा लिएका छन् । यस जिम्मेवारीले एसियाली खेलकुद क्षेत्रमा नेपालको प्रतिनिधित्व थप बलियो बनाउनुका साथै नेपाली उसुको अन्तर्राष्ट्रिय पहुँच विस्तार गर्न सहयोग पुग्ने अपेक्षा गरिएको छ ।