नयाँ प्रशिक्षक एन्जो मारेस्काको नेतृत्वमा चेल्सीले युरोपा कन्फेरेन्स लिग प्लेअफको पहिलो लेगमा स्विट्जरल्यान्डको सेर्भेटलाई २–० ले पराजित गरेको छ।

स्टामफोर्ड ब्रिजमा क्रिस्टोफर नकुन्कुले ५०औं मिनेटमा पेनाल्टीमार्फत गोल गर्दै घरेलु टोलीलाई अग्रता दिलाएका थिए। ७६औं मिनेटमा एन्जो फर्नान्डेजको पासमा नोनी माडुकेले गोल गर्दै चेल्सीको जित पक्का गराए। योसँगै अर्को साता हुने दोस्रो लेगअघि चेल्सी समूह चरणनजिक पुगेको छ।

चेल्सीले इङ्लिस प्रिमियर लिगमा हारबाट सुरुआत गरेको थियो। लिगको पहिलो खेलमा म्यानचेस्टर सिटीविरुद्ध २–० को हार बेहोरेको चेल्सीका लागि यो जितले राहत दिएको छ। माउरिसियो पोचेटिनोको नेतृत्वमा गत सिजन चेल्सी प्रिमियर लिगमा छैटौं स्थानमा रहेको थियो।