पोखरा । सूर्यदर्शन बचत तथा ऋण सहकारी संस्था अपचलन प्रकरणमा दायर प्रतिवादीमाथिको थुनछेक बहसको विषय अदालतमा प्रवेश गरेको छ । जिल्ला सरकारी वकिलले गएको आइतबार जिल्ला अदालत कास्कीमा दायर गरेका थिए । मंगलबार (आज) बिहान जिल्ला प्रहरी कार्यालय कास्कीको हिरासतमा रहेकी आरती गुरुङको बयान लिइएको थियो । न्यायाधीश नितिज राईको इजलासमा बयान सकिएपछि दिउँसोको खाजा समयपश्चात् थुनछेक बहस सुरु भएको हो ।

मंगलबार जिल्ला सरकारी वकिलको तर्फबाट सहायक जिल्ला न्यायाधिवक्ता सुजता पौडेलले बहस गरिन् । उनको बहस सकिएको छ भने अर्की सहन्यायाधिवक्ता शान्तिदेवी शर्माको बहस सुरु भएको हो । उनको बहस भने बुधबार पनि हुनेछ । अभियोगपत्रमा दायर भएको विषयलाई नै समर्थन हुनेगरी सरकारी वकिलहरूले बहस गरेका थिए । सहकारीको मूल्यमान्यता विपरीत संगठित रूपमा अपराध हुने काम गरेको हुँदा अभियोगपत्र अनुसारको बिगो र सजाय हुनुपर्ने तर्क सरकारी वकिलको छ ।

अदालतका स्रेस्तेदार राजन खनालका अनुसार राष्ट्रिय स्वतन्त्र पार्टी (रास्वपा)का सभापति रवि लामिछानेसहित मुद्दा दर्ता भएका सातजनाकै बहस सकिएको छ । बहस सकिएसँगै रविसहित पक्राउ परेकाहरूलाई हिरासतमा फर्काइएको छ । बुधबार सरकारी वकिलकै तर्फबाट विपीनराज तिवारी, कमला काफ्लेसहित महान्यायाधिवक्ताको कार्यालयका नायब महान्यायाधिवक्ता सञ्जीवराज रेग्मी र उपन्यायाधिवक्ता प्रकाश गौतमले बहस गर्नेछन् ।

सरकारी वकिलको बहस सकिएपछि जाहेरवालाको तर्फबाट बहस हुनेछ । जाहरेवाला तर्फको पनि बहस सकिएपछि प्रतिवादीहरूको तर्फबाट बहस हुनेछ । प्रतिवादीको तर्फबाट वरिष्ठ अधिवक्ता सुशिल पन्त, रास्वपा सांसद सोविता गौतम लगायतले बहस गर्ने तयारी छ । दुवै पक्षको बहसपछि सरकारी वकिलको तर्फबाट जवाफी बहस हुनेछ । त्यसपछि उनीहरूलाई थुनामै राखेर मुद्दाको फैसला गर्ने कि थुनाबाहिर राखेर गर्ने भन्ने आदेश हुनेछ । लामिछानेसहित पूर्वडीआईजी छविलाल बन्जाडे जोशी, लीला पछाईं, रामबहादुर खनाल, पूर्वसांसद मीना गुरुङ, कृष्णबहादुर गुरुङ र आरती गुरुङ कास्की प्रहरीको हिरासतमा छन् ।

विभिन्न संस्थासहित ४४ जना प्रतिवादी बनाइएकोमा सहकारी ठगीमा ३१ जनालाई प्रतिवादी बनाइएको छ । उनीहरूबाट एक अर्ब ५१ करोड ४० लाख रुपैयाँभन्दा बढी बिगो माग गरिएको छ । यस्तै, यीमध्ये रविसहित १९ जनालाई संगठित अपराध, चारजनालाई सम्पत्ति शुद्धीकरण र दुईजनालाई क्रिप्टोको कसुरमा समेत अभियोगपत्र दायर गरिएको छ । सम्पत्ति जफतका लागि रविपत्नी निकिता पौडेलसहित पाँचजनालाई पनि प्रतिवादी बनाइएको छ । जिल्ला सरकारी वकिलको कार्यालय, कास्कीले सहकारीको रकम अपचलनको आरोपमा गएको आइतबार रास्वपा सभापति लामिछानेसहित ४४ जनाविरुद्ध मुद्दा दायर गरेको थियो । लामिछानेमाथि सहकारी ठगीसँगै संगठित अपराध र सम्पत्ति शुद्धीकरण कसुरमा समेत मुद्दा दायर भएको छ ।