। साताको सेयर कारोबार हुने दोस्रो दिन सोमबार सेयर बजारमा हरियाली देखिएको छ । अघिल्ला कारोबारहरुमा लगातार रूपमा घटेको बजार आज २६ दशमलव १० अंकले बढेर कारोबार भएको हो ।

आजको कारोबार बन्द हुँदा सेयर बजार परिसूचक २६४० दशमलव ७८ विन्दुमा पुगेको छ । आज सेयर बजारमा कारोबार भएका कम्पनीमध्ये २१० वटा कम्पनीको सेयर मूल्य बढेको छ भने ३३ कम्पनीको सेयर मूल्य भने घटेको छ । त्यस्तै, आज ‘क’ वर्गका कम्पनीको मापक सेन्सेटिभ इन्डेक्स पनि ४ दशमलव ७६ अंकले बढेर ४४४ दशमलव ०९ विन्दुमा पुगेको छ । आज सेयर बजारमा १३ वटै उपसूचकको सेयर मूल्य बढेको छ ।

परिसूचक बढे पनि कारोबार रकममा भने गिरावट आएको छ । अघिल्लो दिन ६ अर्बभन्दा माथिको कारोबार भएको बजारमा आज साढे ४ अर्बभन्दा कमको कारोबार भएको छ । आज सेयर बजारमा ३२६ कम्पनीका ९७ लाख ३९ हजार ७३८ कित्ता सेयर ५८ हजार २३५ पटक खरिद बिक्री हुँदा ४ अर्ब ४८ करोड ३५ लाख ९९ हजार ४ रुपैयाँ बराबरको कारोबार भएको छ ।