काठमाडौं । नेपाल प्रिमियर लिग (एनपीएल)मा बुधबार लुम्बिनी लायन्सले विराटनगर किंग्सलाई पराजित गरेको छ । यो महत्वपूर्ण जितसँगै लुम्बिनीको प्लेअफ पुग्ने सम्भावना समेत कायमै राखेको हो ।

लुम्बिनीले विराटनगर माथि ५ विकेटको जित निकालेको हो । विराटनगरले दिएको १४५ रनको लक्ष्य लुम्बिनीले १७.४ ओभरमा ५ विकेट गुमाएर पूरा गरेको हो । लुम्बिनीको यो ६ खेलमा तेस्रो जित हो । ६ खेलबाट ६ अंक जोडेको लुम्बिनी चौथो स्थानमा उक्लेको छ । लुम्बिनीले अब लिगको अन्तिम खेल जनकपुर बोल्ट्ससँग शुक्रबार खेल्नेछ । उक्त खेल जित्दै अन्य खेलको नितजा आफू अनुकुल आएमा लुम्बिनी प्लेअफ पुग्नेछ ।

अर्कोतर्फ विराटनगरले भने ६ खेलमा दोस्रो हार व्यहोरेको छ । ६ खेलबाट ८ अंक रहेको विराटनगर तेस्रो स्थानमा छ । तर, विराटनगरले लिगमा आफ्नो अन्तिम खेल आउने शनिवार प्लेअफ पुगिसकेको सुदूरपश्चिम रोयल्सँग खेल्नेछ । आजको जितमा लुम्बिनीका लागि डार्सी सर्टले सर्वाधिक ५७ रन बनाए । यस्तै विकेटकिपर निरोशन डिकवेलाले अविजित २९ रन योगदान दिए । सन्दीप जोराले २४ र दिलीप नाथले १६ रन जोडे । सुमित महर्जनले १० रन जोडे । बलिङमा विराटनगरका कप्तान सन्दीप लामिछाने र सुभाष भण्डारीले २/२ विकेट लिए ।

त्यसअघि कीर्तिपुरस्थित टीयू अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको विराटनगरले निर्धारित २० ओभरमा ८ विकेट गुमाएर १४४ रन बनाएको थियो । विराटनगरका लागि लोकेश बमले ३५ रन जोडे । यस्तै बसिर अहमदले २८ रन योगदान दिए । साम हिजलेटले २७ रन बनाए भने एनपीएलमा डेब्यु गर्दै ओपनिङ गरेका दक्षिण अफ्रिकी खेलाडी फाफ डु प्लेसी  १२ रन बनाएर आउट भए । बलिङमा लुम्बिनी लायन्सका शेर मल्लले ३ विकेट लिए । जेजे स्मिथ, अभिशेष गौतम र रुबेन ट्रम्पलम्यानले १–१ विकेट लिए ।