काठमाडौं । मञ्जुश्री फाइनान्सको नाफामा सुधार देखिएको छ । फाइनान्सले सार्वजनिक गरेको चालु आर्थिक वर्षको दोस्रो त्रैमासिकसम्मको अपरिष्कृत वित्तीय विवरण अनुसार गत आर्थिक वर्षको तुलनामा चालु आर्थिक वर्षको पहिलो ६ महिनाको अवधिमा १५.६३ प्रतिशतले वृद्धि भएको हो ।

चालु आर्थिक वर्षको पहिलो ६ महिनासम्ममा फाइनान्सले १३ करोड ५३ लाख रुपैयाँ खुद नाफा आर्जन गरेको छ । गत आर्थिक वर्षको सोही अवधिसम्ममा फाइनान्सले ११ करोड ७० लाख रुपैयाँ खुद नाफा कमाएको थियो । खुद ब्याज आम्दानी र गैर सञ्चालन आम्दानी बढेसँगै फाइनान्सको खुद नाफा बढ्न पुगेको हो ।

समीक्षा अवधिमा फाइनान्सको खुद ब्याज आम्दानी १३.८७ प्रतिशत बढेको छ भने खुद फि तथा कमिशन आम्दानी २.०३ प्रतिशत घटेको छ । त्यसैगरी, समीक्षा अवधिमा फाइनान्सको कुल सञ्चालन आम्दानी १२.६४ प्रतिशत बढेको छ भने सञ्चालन मुनाफा ११.५४ प्रतिशत घटेको छ । पुस मसान्तसम्ममा फाइनान्सको वितरणयोग्य मुनाफा २३ करोड ५६ लाख रुपैयाँ रहेको छ भने वितरणयोग्य प्रतिशेयर आम्दानी ३४ रुपैयाँ ८७ पैसा रहेको छ । नाफासँगै फाइनान्सको प्रतिसेयर आम्दानी पनि बढेको छ । समीक्षा अवधिमा फाइनान्सको यस्तो आम्दानी २ रुपैयाँ ७१ पैसा बढेर २० रुपैयाँ ३ पैसा पुगेको छ।

सो अवधिसम्ममा फाइनान्सको मूल्य आम्दानी अनुपात ३९.८९ गुणा रहेको छ भने प्रतिसेयर नेटवर्थ १७५ रुपैयाँ २९ पैसा रहेको छ ।
१ अर्ब ३५ करोड रुपैयाँ चुक्ता पुँजी रहेको यस फाइनान्सको जगेडा कोषमा १ अर्ब १ करोड ७६ लाख रुपैयाँ सञ्चित छ । पुस मसान्तसम्ममा फाइनान्सले २२ अर्ब ४८ करोड रुपैयाँ निक्षेप संकलन गरी १९ अर्ब ६१ करोड रुपैयाँ कर्जा लगानी गरेको छ।