काठमाडौं । एट्लेटिको म्याड्रिड र आर्सनलबीच च्याम्पियन्स लिग सेमिफाइनलको पहिलो लेग १–१ को बराबरीमा सकिएको छ । पहिलो हाफ र दोस्रो हाफको बीचमा भिक्टर ग्योकेरेस र जुलियन अल्भारेजले एक–एक पेनाल्टी गोल गरे। तर खेलको अन्त्यतिर आर्सनलले पाएको पेनाल्टी भिएआर जाँचपछि रद्द भएपछि उनीहरूले सम्भावित जित गुमाए ।

खेलको सुरुवातमा जुलियन अल्भारेज र नोनी माडुएकेले उत्कृष्ट अवसर पाए पनि गोल गर्न सकेनन्। त्यसपछि पहिलो हाफ सकिन एक मिनेट बाँकी रहँदा आर्सनलले पाएको अवसरलाई सदुपयोग गर्‍यो। डेभिड हान्कोले पेनाल्टी क्षेत्रभित्र भिक्टर ग्योकेरेसलाई लडाएपछि आर्सनलले पेनाल्टी पाएको थियो। स्विडेनका फरवार्ड ग्योकेरेसले गरेको पेनाल्टी प्रहार रोक्न गोलकिपर यान ओब्लाक सही दिशामा हाम फाले पनि रोक्न सकेनन्।

दोस्रो हाफ सुरु भएपछि एट्लेटिको आक्रामक रूपमा खेलमा फर्कियो। अल्भारेजको फ्रिकिक गोलपोस्ट बाहिर गयो भने भिएआर समीक्षा पछि बेन ह्वाइटले ह्यान्डबल गरेको भन्दै एट्लेटिकोलाई पेनाल्टी दिइयो। खेलको ५६औँ मिनेटमा अल्भारेजले पेनाल्टी गोल गर्दै बराबरी फर्काए। गोलरक्षक डेभिड राया गोल लाइनमै उभिएको अवस्थामा बल जालीको माथिल्लो कुनामा पुगेको थियो।

मेट्रोपोलिटानो मैदानमा आफ्नो अन्तिम च्याम्पियन्स लिग खेल खेलिरहेका एन्टोइन ग्रिजमनले त्यसपछि चिप प्रहार गर्दा बल पोस्टमा लागेको थियो। त्यसपछिको कर्नरमा राया सक्रिय हुँदै अल्भारेजको प्रहार रोके। खेलको अन्त्यतिर अदेमोला लुक्मानको उत्कृष्ट अवसर पनि रायाले बचाए। त्यसपछि एबेरेची एजे लडाएपछि आर्सनलले पेनाल्टी पाएको जस्तो देखिए पनि रेफ्रीले भिएआर मोनिटर हेरेपछि हान्कोको सम्पर्क न्यून रहेको भन्दै निर्णय उल्ट्याए।

एट्लेटिकोले च्याम्पियन्स लिगको नकआउट चरणमा आफ्नै मैदानमा कुनै पनि इंग्लिस टोलीसँग हार व्यहोरेको छैन (३ जित, ४ बराबरी)। एट्लेटिकोले च्याम्पियन्स लिगको एउटै खेलमा पहिलो पटक पेनाल्टी गोल पनि ग¥यो र पेनाल्टीबाट गोल खायो। आर्सनलका लागि भने यस्तो घटना दोस्रो पटक हो।

अल्भारेजको यो पेनाल्टी गोल उनको च्याम्पियन्स लिगमा ४१ खेलमा गरेको २५औँ गोल हो। दक्षिण अमेरिकी खेलाडीमध्ये सबैभन्दा कम खेलमा २५ गोल गर्ने कीर्तिमान उनले बनाए। यसअघि लियोनल मेस्सीले ४२ खेलमा यो उपलब्धि हासिल गरेका थिए। मंगलबारको भएको अर्को सेमिफाइनलको पहिलो लेगमा पेरिस सेन्ट जर्मेनले बायर्न म्युनिखलाई ५–४ ले हराएको थियो।