काठमाडौं । सन नेपाल लाइफ इन्स्योरेन्स कम्पनी लिमिटेडको नाफामा करिब साढे ३ प्रतिशतको वृद्धि देखिएको छ । कम्पनीले सार्वजनिक गरेको चालू आर्थिक वर्षको तेस्रो त्रैमासिकसम्मको अपरिष्कृत वित्तीय विवरण अनुसार नाफामा ३.३५ प्रतिशतले वृद्धि भएको हो ।

वित्तीय विवरण अनुसार चालु आर्थिक वर्षको चैत मसान्तसम्मको अवधिमा कम्पनीले ३४ करोड रुपैयाँ खुद नाफा कमाएको छ । कम्पनीले गत आवको चैत मसान्तसम्म ३२ करोड ८९ लाख रुपैयाँ खुद नाफा कमाएको थियो । समीक्षा अवधिमा कम्पनीको जीवन बीमाकोष ९ अर्ब ५१ करोड रुपैयाँबाट २५ प्रतिशतले बढेर ११ अर्ब ९० करोड रुपैयाँ पुगेको छ ।

त्यस्तै कम्पनीको आम्दानी भने केही खुम्चिएको छ। समीक्षा अवधिमा खुद बीमाशुल्क आर्जन ३ अर्ब ७१ करोड रुपैयाँबाट ५ प्रतिशतले घटेर ३ अर्ब ५२ करोड रुपैयाँमा सीमित भएको छ । समीक्षा अवधिमा कम्पनीको कुल आम्दानी १.६१ प्रतिशतले घटेको छ भने कुल खर्च १.७६ प्रतिशतले बढेको छ । अभिकर्तालाई दिइने कमिशन भने १०.१२ प्रतिशतले वृद्धि भएर ३१ करोड ६७ लाख रुपैयाँ नाघेको छ ।

प्रतिसेयर आम्दानी ११.०७ रुपैयाँबाट घटेर ८.५५ रुपैयाँमा झरेको छ । कम्पनीको प्रतिसेयर नेटवर्थ १४१.३८ रुपैयाँ छ । चुक्ता पूँजी ५ अर्ब २८ करोड रुपैयाँ रहेको कम्पनीको महाविपत्ति कोषमा २३ करोड ३२ लाख रुपैयाँ र जगेडा कोषमा ३० करोड ६४ लाख रुपैयाँ सञ्चिति रहेको छ ।