काठमाडौँ । महिला, बालबालिका, लैंगिक तथा यौनिक अल्पसङ्ख्यक र सामाजिक सुरक्षा मन्त्री सिता बादीले स्वर्गीय अजित मिजारका परिवारसँग भेट गरी उनको मृत्यु प्रकरण र न्यायप्राप्तिसँग सम्बन्धित विषयमा छलफल गरेकी छन्।

काठमाडौँमा शुक्रबार भएको भेटमा मिजारका परिवारले लामो समयदेखि न्यायको प्रतीक्षा गर्दा भोग्नुपरेको पीडा र अनुभवबारे मन्त्री बादीलाई जानकारी गराएका छन्। परिवारले न्यायप्राप्तिका सम्बन्धमा आफ्ना अपेक्षा र सरोकारसमेत राखेको थियो।

मन्त्री बादीले परिवारका कुरा सुन्दै न्यायका लागि लामो समय प्रतीक्षा गर्नुपर्ने अवस्था कुनै पनि नागरिकका लागि दुःखद भएको बताएकी छन्। पीडितको आवाज सुन्नु, मानव अधिकारको संरक्षण गर्नु र विधिको शासन प्रभावकारी रूपमा कार्यान्वयन गर्नु राज्यको दायित्व भएको उनको भनाइ छ।

मन्त्री बादीले सत्य र न्यायको सुनिश्चिततासँगै संविधानले प्रत्याभूत गरेका अधिकारको प्रभावकारी कार्यान्वयन लोकतान्त्रिक शासन व्यवस्थाको आधार भएको बताएकी छन्।

मिजार परिवारले उठाएका जायज सरोकार सम्बन्धित निकायसम्म पुर्‍याउन आवश्यक समन्वय तथा पहलमा मन्त्रालय आफ्नो जिम्मेवारीअनुसार सक्रिय रहने उनले स्पष्ट पारेकी छन्।

जातीय विभेद, सामाजिक अन्याय तथा सबै प्रकारका भेदभावविरुद्ध राज्य दृढ रूपमा उभिनुपर्ने उल्लेख गर्दै मन्त्री बादीले संवैधानिक हक, समानता र सामाजिक सुरक्षाको सुनिश्चितताका लागि सम्बन्धित निकायबीच प्रभावकारी सहकार्य आवश्यक रहेको बताएकी छन्।