काठमाडौं । आईसीसी क्रिकेट विश्वकप लिग–२ अन्तर्गत ओमानमा जारी एकदिवसीय अन्तर्राष्ट्रिय (ओडीआई) श्रृंखलाको अन्तिम खेलमा नेपालले आज घरेलु टोली ओमानसँग प्रतिस्पर्धा गर्दैछ । अल अमेरत क्रिकेट ग्राउन्डमा हुने खेल नेपाली समयअनुसार बिहान ११ः१५ बजे सुरु हुनेछ ।

लिग–२ को शीर्ष ६ मा स्थान सुरक्षित गर्ने लक्ष्यमा रहेको नेपालका लागि आजको खेल निर्णायक बनेको छ । सुरुवाती दुई खेलमा क्यानडा र ओमानलाई हराएको नेपाल शनिबार क्यानडासँग पराजित भएपछि अंकतालिकाको सातौँ स्थानमा झरेको थियो ।

३५ खेलबाट २८ अंक जोडेको नेपाललाई उछिन्दै क्यानडा ३६ खेलमा २९ अंकसहित छैटौँ स्थानमा पुगेको छ । आज ओमानलाई पराजित गर्न सके नेपाल पुनः छैटौँ स्थानमा उक्लिनेछ । लिग–२ को शीर्ष ६ मा रहन सके एकदिवसीय अन्तर्राष्ट्रिय मान्यता जोगाउने सम्भावना बलियो हुने भएकाले नेपालका लागि यो खेल निकै महत्त्वपूर्ण छ ।