काठमाडौं । साताको दोस्रो दिन सोमबार सेयर बजारमा उच्च अंकको गिरवाट आएको छ । अघिल्लो दिन ११ अंकको सुधार भएको सेयर बजारमा आज ५९ अंकको गिरावट आएको हो ।

सोमबारको कारोबार बन्द हुँदा नेप्से परिसूचक ५९ दशमलव ०२ अंकले घटेको छ । आजको कारोबार बन्द हुँदा परिसूचक २५२९ दशमलव ३३ विन्दुमा पुगेको छ । यो अघिल्लो दिनको तुलनामा २.२८ प्रतिशतले कम हो ।

आज सेयर बजारमा कारोबार भएका कम्पनीमध्ये जम्मा १४ वटाको सेयर मूल्य मात्रै बढ्यो भने २२९ कम्पनीको सेयर मूल्य घटेको छ । एक कम्पनीको सेयर मूल्यमा भने स्थिर रहेको छ । त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि ९.०२ अंकले घटेर ४५४ दशमलव ४० विन्दुमा पुगेको छ । आज सेयर बजारमा १३ वटै समूहको उपसूचक राताम्य भएर बन्द भएको छ ।

नेप्से उच्च अंकले घटे पनि आज कारोबार रकममा भने अघिल्लो दिनको भन्दा सामान्य सुधार देखिएको छ । अघिल्लो दिन ५ अर्ब ९ करोडको कारोबार भएको बजारमा आज ५ अर्ब ६६ करोड भन्दा बढीको कारोबार भएको छ ।

आज सेयर बजारमा ३२९ कम्पनीका १ करोड ३५ लाख ३५ हजार ९०३ कित्ता सेयर ७७ हजार १५३ पटक खरिद बिक्री हुँदा ५ अर्ब ६६ करोड ३ लाख २ हजार ६८३ रुपैयाँको कारोबार भएको छ । आज सेयर बजारमा कारोबार भएका कम्पनी मध्ये ४ कम्पनीको सेयर मूल्यमा नकारात्मक सर्किट लागेर बन्द भएको छ ।