काठमाडौं । टोटनह्याम हटस्परका स्ट्राइकर डोमिनिक सोलान्केलाई सात वर्षपछि इङ्ल्यान्डको टोलीमा समेटिएको छ । अन्तरिम प्रशिक्षक ली कार्स्लेले शुक्रबार ग्रीस र फिनल्यान्डविरुद्ध अर्को साता हुने नेसन्स लिग खेलका लागि उनलाई समावेश गरेका हुन् ।

सन् २०१७ मा ब्राजिलविरुद्धको मैत्रीपूर्ण खेलमा उनले इङ्ल्यान्डको टोलीमा डेब्यु गरेका थिए । सोलान्केले टोटनह्यामका लागि पछिल्ला तीन खेलमा गोल गरेका छन् । अगस्टमा बोर्नमाउथबाट ६ करोड ५० लाख पाउन्ड (८ करोड ५२ लाख ५० हजार अमेरिकी डलर)मा उनी टोटनह्याम गएका थिए ।

त्यस्तै रियल म्याड्रिडका मिडफिल्डर जुड बेलिङ्घमले पनि युरो कप २०२४ पछि इङ्ल्यान्डको टोलीमा पुनरागमन गरेका छन् । बेलिङ्घमले चोटका कारण सेप्टेम्बरमा अन्तर्राष्ट्रिय खेल गुमाएका थिए । तर, बिहीबार ग्रीस र फिनल्यान्डविरुद्धको नेसन्स लिग खेलका लागि अन्तरिम प्रशिक्षक ली कार्स्लेको २५ सदस्यीय टोलीमा उनलाई समावेश गरेका छन् ।

इङ्ल्यान्डले शुक्रबार वेम्बलीमा ग्रीस र अक्टोबर १३ मा हेल्सिन्कीमा फिनल्यान्डसँग खेल्नेछ ।