काठमाडौं । दसैँभन्दा अघिको अन्तिम कारोबार दिन सेयर बजार परिसूचक सामान्य अंकले बढेको छ । दिनभरको घटबढमा अन्तिम समयमा बजारमा हरियाली देखिएको हो ।

बुधबारको कारोबार बन्द हुँदा सेयर बजार परिसूचक ४ दशमलव ८५ अंकले बढेर २६६८ दशमलव १७ विन्दुमा पुगेको हो । आज सेयर बजारमा कारोबार भएका कम्पनीमध्ये १३० कम्पनीको सेयर मूल्य बढेको छ भने १०२ कम्पनीको सेयर मूल्य घटेको छ ।

त्यस्तै ११ कम्पनीको सेयर मूल्य भने स्थिर रहेको छ । त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि ० दशमलव १३ अंकले बढेर ४८० दशमलव ३६ विन्दुमा पुगेको छ । आज १३ उपसूचकमध्ये ९ वटा उपूचकको सेयर मूल्य बढेको छ भने ४ वटाको घटेको छ ।

आज परिसूचक सामान्य बढे पनि कारोबार रकममा भने गिरावट आएको छ । अघिल्लो दिन ७ अर्बभन्दा बढीको कारोबार भएको बजारमा आज ३ अबै ७६ करोडभन्दा बढीको मात्रै कारोबार भएको छ । आज सेयर बजारमा २९४ कम्पनीका ८३ लाख १२ हजार ६८५ कित्ता सेयर ४० हजार १३१ पटक खरिद बिक्री हुँदा ३ अर्ब ७६ करोड १५ लाख १२ हजार ७०६ रुपैयाँ बराबरको कारोबार भएको छ ।

आज सेयर बजारमा कारोबार भएका कम्पनीमध्ये एक कम्पनीको सेयर मूल्यमा सकारात्मक सर्किट लागेको छ भने एक कम्पनीको सेयर मूल्यमा नकारात्मक सर्किट लागेको छ ।