काठमाडौं । नेपाल लाइफ इन्स्योरेन्स कम्पनी लिमिटेडको लाभांश सुरक्षित गर्ने आज माघ ९ गते अन्तिम दिन रहेको छ । २५औं वार्षिक साधारणसभा तथा लाभांश वितरण प्रयोजनार्थ कम्पनीले भोलि माघ १० गते बुक क्लोज गर्दैछ ।

बुक क्लोजका आधारमा आजसम्म नेप्सेमा कारोबार भई कायम सेयरधनीहरू मात्रै कम्पनीको सभामा भाग लिन र सभाबाट पारित लाभांश प्राप्त गर्न योग्य हुनेछन्। कम्पनीले हाल कायम चुक्ता पुँजीको १० प्रतिशत बोनस सेयर र ११.०५ प्रतिशत नगद (कर समेत) लाभांश वितरणको प्रस्ताव गरेको छ । लाभांश पारित गर्न माघ २८ गते सोमबार पर्सा जिल्लाको वीरगंजस्थित होटल भिष्वामा बिहान ९ बजेदेखि कम्पनीको साधारणसभा बस्दैछ ।

बोनस सेयर वितरणपछि जारी चुक्ता पुँजीलाई तदनुरुप वृद्धि गर्ने प्रस्ताव पनि सभाले पारित गर्नेछ । यसका साथै गत आर्थिक वर्ष (आव) को वार्षिक प्रतिवेदन सहितका वित्तीय विवरण पारित गर्नुका साथै चालू आवको लागि लेखापरीक्षक नियुक्ति र पारिश्रमिक निर्धारणको विषय टुङ्ग्याउनेछ ।