काठमाडौं । रियल म्याड्रिडले युइएफए च्याम्पियन्स लिगको नयाँ सिजनमा विजयी सुरुवात गरेको छ । सान्टियागो बर्नाबेउमा मंगलबार राति भएको खेलमा रियलले इन्टर मिलानलाई २–१ गोलले पराजित गरेको हो ।

रियलको जितमा किलियन एमबाप्पे र फेडेरिको भाल्भेर्देले गोल गरे । इन्टरका लागि कार्लोस अगुस्टोले एक गोल फर्काए । खेलको १४औँ मिनेटमा एमबाप्पेले गोल गर्दै रियललाई अग्रता दिलाए। इन्टरको रक्षापंक्तिको गल्तीको फाइदा उठाउँदै एमबाप्पेले गोल गरेका थिए ।

त्यसपछि २३ औँ मिनेटमा भाल्भेर्देले रियलको अग्रता दोब्बर बनाए । इन्टरका गोलरक्षक जोसेप मार्टिनेजले बल नियन्त्रण गर्ने क्रममा गरेको गल्तीको फाइदा उठाउँदै भाल्भेर्देले गोल गरे । पहिलो हाफ सकिँदा रियल २–० ले अघि रह्यो ।

दोस्रो हाफमा इन्टरले खेलमा फर्किने प्रयास गर्‍यो । ७७औँ मिनेटमा अगुस्टोले गोल गर्दै अन्तर २–१ मा झारे । त्यसपछि इन्टरले बराबरी गोलका लागि दबाब बढाए पनि रियलले अग्रता जोगाउँदै ३ अंक हात पार्‍यो ।