काठमाडौं । नेपाल प्रिमियर लिग (एनपीएल)को तेस्रो संस्करणका लागि कर्णाली याक्सको एपरेल पार्टनरका रूपमा एभर राइज स्पोर्टस प्रालि आबद्ध भएको छ । कर्णाली याक्सका क्रिकेट निर्देशक ज्ञानेन्द्र मल्ल र एभर राइज स्पोर्टस प्रालिका निर्देशक शेख मोहम्मद सभमनले बिहीबार सम्झौतापत्रमा हस्ताक्षर गरे ।

यो सम्झौतासँगै कर्णालीले तेस्रो सिजनको एनपीएलमा एभर राइजको पोशाक लगाउने छ । गत संस्करण पनि एभर राइज नै कर्णालीको एपरेल पार्टनर रहेको थियो । एभर राइज भारतीय स्पोर्टस वेयर कम्पनी हो । सम्झौतापछि कर्णाली याक्सका निर्देशक मल्लले लगातार दोस्रो वर्षको सहकार्यको लागि एभर राइजलाई धन्यवाद दिए ।

एभर राइजका निर्देशक शेख मोहम्मद सभमनले लगातार दोस्रो वर्ष कर्णाली याक्ससँग आबद्ध हुन पाउँदा खुसी लागेको बताए । सोमपाल कामी मार्की खेलाडी रहेको कर्णाली याक्सले मिनि अक्सनबाट १३ खेलाडी टोलीमा अनुबन्धित गरिसकेको छ । एनपीएलको तेस्रो संस्करण आगामी अक्टोबर २६ तारिखदेखि शुरू हुँदैछ ।