काठमाडौं । रसुवामा आएको विनाशकारी बाढी प्रभावित क्षेत्रमा रहेका वाणिज्य बैंकका ९ वटा शाखा कार्यालयहरू बाढीको प्रत्यक्ष चपेटामा परेका छन् । बाढीले सबैजसो बैंक शाखाका भवन तथा भौतिक संरचना बगाएको वा पूर्ण रूपमा क्षतिग्रस्त बनाएको नेपाल बैंकर्स संघले जानकारी दिएको छ ।

संघका अनुसार बैंकका कार्यालयमा कार्यरत आधाभन्दा बढी कर्मचारी अझै सम्पर्कमा आएका छैनन् । त्यस क्षेत्रमा नबिल बैंक, प्रभु बैंक, ग्लोबल आइएमई बैंक लगायतका शाखा कार्यालयहरू रहेका थिए । क्षतिग्रस्त शाखाहरूको यकिन ,क्षति विवरण संकलन र कर्मचारीहरूको खोजी तथा उद्धार कार्यलाई गर्ने प्रयास भइरहेको छ ।