काठमाडौं । नेपालले अमेरिका विरुद्धको टि–२० सिरिज क्लिन स्वीप गरेको छ । आज सम्पन्न तेस्रो तथा अन्तिम खेलमा अमेरिकालाई ८ विकेटले पराजित गर्दै नेपालले सिरिज क्लिन स्वीप गरेको हो ।

अमेरिकाले दिएको १५७ रनको लक्ष्य नेपालले १८ औभरमा ४ बलमा २ विकेट गुमाएर पुरा गरेको हो । नेपालका लागि आशिफ सेखले ५० रनको योगदान दिए । त्यस्तै कुशल मल्लले अविजित ४४ रन बनाए । कुशल भुर्तेलले पनि ४० रनको अविजित पारी खेले । त्यस्तै ओपनर अनिल साहले १३ रनको पारी खेले । अमेरिकाका लागि जुआनोय ड्रिसडेल र जसदीप सिंहले १–१ विकेट लिए ।

यस अघि डालासमा टस जितेर पहिले ब्याटिङ गरेको घरेलु टोली अमेरिकाले २० ओभरमा ५ विकेट गुमाएर १ सय ५६ रन बनाएको थियो । अमेरिकाका साइतेजा मुकामलाले ६८ तथा मिलिन्द कुमारले नटआउट ४३ रन बनाए । नेपालका सोमपाल कामीले ३ तथा रिजन ढकाल र ललित राजवंशीले समान १ विकेट लिए ।

अमेरिकासँगको पहिलो खेलमा नेपाल १७ रन र दोस्रो खेलमा सुपर ओभरमा विजयी भएको थियो । टी–२० सिरिज पछि घरेलु टोली अमेरिका, नेपाल र स्कटल्यान्डबीच आईसीसी विश्वकप क्रिकेट लिग–२ अन्तर्गत त्रिदेशीय एकदिवसीय सिरिज हुनेछ ।