काठमाडौं । आइजीआई प्रुडेन्सियल इन्स्योरेन्स कम्पनी लिमिटेडले चालु आर्थिक वर्षको दोस्रो त्रैमासिकसम्मको अवधिमा १४ करोड भन्दा बढी नाफा कमाएको छ । कम्पनीले सार्वजनिक गरेको चालु आर्थिक वर्षको दोस्रो त्रैमासिकसम्मको वित्तीय विवरण अनुसार १४ करोड ३० लाख रुपैयाँ नाफा कमाएको हो ।

चालु आवको ६ महिनामा कम्पनीको नाफा गत आवको सोही अवधिको तुलनामा २२.१४ प्रतिशतले घटेको छ । गत आवमा कम्पनीको यस्तो नाफा १८ करोड ३७ लाख रुपैयाँ रहेको थियो । कम्पनीले गत आवमा कुल आम्दानी ९० करोड रुपैयाँ रहेकोमा चालु आवमा घटेर ८९ करोड ७८ लाख रुपैयाँ कायम भएको छ । त्यस्तै, खुद बीमाशुल्क आर्जन गत आवमा ५१ करोड २३ लाख रुपैयाँ रहेकोमा चालु आवमा घटेर ५० करोड ८ लाख रुपैयाँमा कायम भएको छ । नाफा घटेसँगै कम्पनीको प्रतिसेयर आम्दानी समेत घटेको छ । कम्पनीको प्रतिसेयर आम्दानी गत आवमा १२ रुपैयाँ १३ पैसा रहेकोमा चालू आवमा घटेर ९ रुपैयाँ ४५ पैसा कायम भएको छ ।

चुक्ता पुँजी ३ अर्ब २ करोड रुपैयाँ रहेको कम्पनीको स्पेशल रिजर्भमा १ अर्ब ७५ करोड रुपैयाँ, रिटेन्ड अर्निङमा ३६ करोड रुपैयाँ र महाविपत्ति कोषमा ८ करोड रुपैयाँभन्दा बढी सञ्चित रहेको छ । गत आवमा कम्पनीको निर्जीवन बीमा कोषमा ४ अर्ब ५५ करोड रुपैयाँ रहेकोमा चालु आवमा बढेर ४ अर्ब ९२ करोड रुपैयाँ नाघेको छ । कम्पनीको प्रतिसेयर नेटवर्थ १ सय ९० रुपैयाँ ९४ पैसा रहेको छ।